Ystradgynlais

Croeso i Ystradgynlais, lle llawn hyfrydwch a gwyrddni!  Mae’r dref hon yng nghanol Cymru, yn gyfuniad hyfryd o hanes, harddwch naturiol, a chymeriad lleol. Os ydych chi'n meddwl tybed sut i fynd o gwmpas y dref fach hon, darllenwch y daith braf yr ydym wedi creu na wnewch chi ei hanghofio. 

Bore:

Dechreuwch drwy fynd am dro: Dechreuwch eich diwrnod gyda thaith gerdded hamddenol drwy strydoedd prydferth y dref. Anadlwch awyr iach Cymru a rhyfeddu at yr adeiladau hanesyddol sy'n ymddangos fel petaent yn sibrwd hanesion o'r oes o’r blaen. Ewch am dro drwy ganol y dref, gan ddarganfod yr amrywiaeth o siopau, caffis a busnesau lleol. Wrth i chi grwydro, byddwch yn sylwi ar nifer o gapeli, eglwysi a themlau, sy'n adlewyrchu twf hanesyddol y dref.

Crôl caffis: Gwnewch eich ffordd i gaffi lleol ar gyfer brecwast blasus Cymreig. Rhowch gynnig ar y pice bach traddodiadol Cymreig – i ddeffro’r blasbwyntiau a rhoi coflaid i’ch synhwyrau Parwch e gyda phaned o de neu goffi poeth a byddwch chi'n barod am anturiaethau'r dydd.

Darganfod Parc Treftadaeth Gwaith Haearn Ynyscedwyn. Crwydrwch drwy olion yr hyn a oedd unwaith yn safle diwydiannol prysur. Sylwch ar olygfa’r  simnai unigol a'r bwáu trawiadol, sy'n dyst i dreftadaeth ddiwydiannol gyfoethog yr ardal.

Nesaf, ewch draw i Barc Diemwnt, man gwyrdd eang sydd wedi'i drawsnewid o fod yn hen byllau glo’r Diamond a’r Gurnos. Mwynhewch daith gerdded hamddenol ar hyd y llwybrau drwy ddolydd blodau gwyllt a gwlyptiroedd. Cofiwch weld Cofeb y Glowyr, sy'n adrodd straeon y diwydiannau a fu unwaith yn ffynnu yma.

Amser cinio: 

Ewch am damaid o fwyd yn un o dai bwyta clyd y dref. Efallai y byddwch yn darganfod hoff bryd newydd – neu o leiaf, fwynhau pryd o fwyd yn yr awyrgylch hyfryd lleol. Mae'r olygfa goginio yma mor amrywiol a hyfryd â'r dirwedd.

Prynhawn:

Paradwys i’r haneswyr: Plymiwch i mewn i hanes lleol gydag ymweliad â Chanolfan Treftadaeth Ystradgynlais. Byddwch yn barod am arddangosion a straeon diddorol a fydd yn gwneud i chi deimlo fel hanesydd lleol anrhydeddus. Pwy wyddai fod dysgu am y gorffennol yn gallu bod mor ddiddorol? 

Maes chwarae natur: 

Ar ôl trwytho mewn rhywfaint o hanes, ewch allan i'r mannau gwyrdd cyfagos. Boed ar lannau afonydd tawel neu'r bryniau mwyn, mae Ystradgynlais yn hafan i bobl sy'n frwd dros yr awyr agored. Perffaith ar gyfer tro hamddenol neu bicnic mewn llecyn pert – peidiwch ag anghofio’ch camera!

Archwiliwch ochr wyllt Ystradgynlais yng Ngwarchodfa Natur Wern Plemys. Mae'r ardal hon, a oedd unwaith yn faes glo, bellach yn hafan werdd o goedwigoedd a gwlyptiroedd. Mae'n lle gwych i bobl sy'n frwd dros natur wylio bywyd gwyllt lleol a dod o hyd i olion yr hen reilffordd.

Ewch i Barc yr Orsedd ger Eglwys Sant Cynog. Yma, gallwch weld Meini’r Orsedd i goffáu cynnal Eisteddfod Genedlaethol Ystradgynlais ym 1954. Mae'r parc hefyd yn cynnwys cofeb rhyfel trawiadol sy'n anrhydeddu trigolion lleol a wasanaethodd yn y Rhyfeloedd Byd.

Siopa’n lleol: 

Crwydrwch drwy siopau a bwtîcs pert y dref. O gofroddion unigryw i eitemau wedi'u gwneud â llaw, byddwch yn dod o hyd i drysorau a fydd yn eich atgoffa o'ch antur yn Ystradgynlais ymhell ar ôl i chi adael. Cofiwch,  nid yn unig yw prynu’n lleol yn hwyl ond mae’n helpu i gefnogi'r gymuned hefyd.

Gyda’r nos:

Cwis tafarn neu gerddoriaeth fyw: Wrth i'r haul fachlud, ymgollwch yn y diwylliant lleol bywiog. P'un a yw'n ymuno â chwis tafarn gyfeillgar neu wrando ar gerddoriaeth fyw, fe welwch fod Ystradgynlais yn gwybod sut i ddiddanu. Diweddwch eich diwrnod gyda rhywfaint o adloniant yn y Neuadd Les, theatr Ystradgynlais a'r ganolfan ddiwylliannol gymunedol. Agorwyd y lle ym 1934 gyda rhoddion gan lowyr lleol, mae'n cynnig ystod amrywiol o ddigwyddiadau o gerddoriaeth fyw a dramâu i sgriniau ffilm a hyd yn oed perfformiadau byw-ffrydio o theatrau Llundain.